Unha curta de sabor auténtico

FURANCHO, BOTA VIÑO! é un proxecto de curtametraxe en lingua galega que nace con vocación de seguir medrando (ata onde nos leven o maxín e os recursos económicos). 

A idea e o reto de crear esta COMEDIA FAMILIAR nun AUTÉNTICO FURANCHO de GALICIA xurde nunha VIAXE que ELENA GALLEGO ABAD e MAYKA BRAÑA fixemos entre Marín e Vigo unha tarde do pasado inverno.

Imaxinade a escena: Unha recoñecida ESCRITORA e unha prestixiosa ACTRIZ galegas cruzan a PONTE DE RANDE entre refachos de nordés, falando sobre GUIÓN e SERIES de televisión.

"Por que non facemos algo xuntas?", concluímos.

Así, pasou o que tiña que pasar. 

— SINOPSE

MAYKA, executiva dunha consignataria de buques do porto de Marín, reabre o furancho familiar tras deixar o seu emprego, indignada porque o seu xefe, CARLOS, contratou ao sobriño da súa dona para o posto de adxunto á dirección ao que ela aspira, por ser parente, máis novo e guapo, e ter más seguidores en Instagram.

Pero facerse cargo da pequena adega familiar non será tan doado como aparenta. Chega o día da inauguración e CASILDA, a matriarca, non deixa de amolar co seu afán pola limpeza. A súa tía cociñeira non aparece, a filla adolescente senta nun recuncho a ensaiar co clarinete, os primeiros clientes cóanse antes da hora de apertura cunha televisión para ver un partido de fútbol, unha parella da garda civil (o CABO ORTEGAL e a súa sobriña en prácticas FERRO) está a piques de facerlle perder os papeis...

Cando o desastre semella irreversible, aparece pola porta o seu irmán NANO, que acaba de perder o seu emprego na capital. Pero o cociñeiro estrela non parece disposto a regresar ao posto de pinche e poñerse a mondar patacas para facer unhas simples tortillas.

Na súa nova vida furancheira, Mayka vivirá tolas peripecias.

MAYKA BRAÑA ponse á fronte da DIRECCIÓN desta comedia familiar, con guión de ELENA GALLEGO ABAD, que nos permitirá espallar os valores furancheiros polo mundo.

Rodaremos nun auténtico furancho das Rías Baixas (FURANCHO LOIS en Marín, Pontevedra), coa complicidade de grandes talentos da escena galega:

Por orde de aparición na curta, xunto a Mayka Braña veremos a CASILDA ALFARO, a nena ALEJANDRA ARCOS, a TETÉ DELGADO, a ANXO CARBAJAL, a NANO RIVAS, a ALFONSO AGRA, a PEPO SUEVOS, a CARLOS BLANCO, a PACO PERNAS.

Con tanto TALENTO en estado puro, imaxinas a que se pode montar? 
Temos unha GRAN COMEDIA asegurada!